അടച്ചുപൂട്ടലില്‍ നിന്ന് കരകയറി എടക്കഴിയൂര്‍ ഗവ.ലോവര്‍ പ്രൈമറി സ്‌കൂള്‍. ഡിജിറ്റല്‍ എയര്‍കണ്ടീഷന്‍ സൗകര്യങ്ങളോടെ ഭൗതിക നിലവാരത്തിലേയ്ക്ക് ഉയര്‍ന്ന എടക്കഴിയൂര്‍ ലോവര്‍ പ്രൈമറി സ്‌കൂളിന്റെ ഉദ്ഘാടനം മെയ് 31ന് വൈകുന്നേരം 4 മണിക്ക് എന്‍ കെ അക്ബര്‍ എം എല്‍ എ നിര്‍വ്വഹിക്കും.
125 വര്‍ഷത്തിലധികം ചരിത്ര പാരമ്പര്യമുള്ള എടക്കഴിയൂര്‍ ജി.എല്‍.പി. സ്‌കൂള്‍ ദേശീയപാതയ്ക്കരികില്‍ സ്വകാര്യഭൂമിയില്‍ ഓല ഷെഡിലാണ് പ്രവര്‍ത്തിച്ചു വന്നിരുന്നത്. ഭൂവുടമകള്‍ തമ്മിലുള്ള തര്‍ക്കത്തെ തുടര്‍ന്ന് നവീകരണപ്രവര്‍ത്തനങ്ങള്‍ നടക്കാതെ വിദ്യാലയം തകര്‍ച്ചയുടെ വക്കിലായി. നവീകരണ പ്രവര്‍ത്തനങ്ങള്‍ നടക്കാത്തതിനാലും പരിമിത പഠന സൗകര്യങ്ങളാലും വിദ്യാര്‍ത്ഥികളുടെ എണ്ണവും കുറഞ്ഞു.
2002ല്‍ അടച്ചുപൂട്ടല്‍ നേരിടുന്ന വിദ്യാലയങ്ങളുടെ പട്ടികയില്‍ എടക്കഴിയൂര്‍ സ്‌കൂളിനെയും ഉള്‍പ്പെടുത്തിയിരുന്നു. പിന്നീട് വിവിധ ഘട്ടങ്ങളിലായി ഗ്രാമ, ബ്ലോക്ക്, ജില്ലാ പഞ്ചായത്ത് ഫണ്ടുകള്‍ എംഎല്‍എ, എംപി ഫണ്ടുകള്‍, സര്‍ക്കാര്‍ ഫണ്ടുകള്‍ എന്നിവയുടെ സഹായത്തോടെ സ്വന്തമായി ഭൂമി കണ്ടെത്താനും ആവശ്യമായ കെട്ടിടങ്ങളുടെ നിര്‍മ്മാണം പൂര്‍ത്തിയാക്കാനും കഴിഞ്ഞു. എന്നാല്‍ സ്മാര്‍ട്ട് ക്ലാസ് റൂം ഉള്‍പ്പെടെയുള്ള ആധുനിക സൗകര്യങ്ങള്‍ ഉണ്ടായിരുന്നില്ല. തുടര്‍ന്ന് പുന്നയൂര്‍ ഗ്രാമപഞ്ചായത്ത് ഭരണസമിതിയുടെ ”എല്ലാ വിദ്യാലയങ്ങളും മികവിലേയ്ക്ക്” എന്ന പ്രഖ്യാപിത നയത്തിന്റെ ഭാഗമായി ജി.എല്‍.പി. സ്‌കൂളിനെ നവീകരണത്തിനായി തിരഞ്ഞെടുത്തു. ഇതിന്റെ ഭാഗമായി 76,40,000 രൂപ വകയിരുത്തി.
54 ലക്ഷം രൂപ ചെലവഴിച്ചാണ് ആധുനിക സൗകര്യങ്ങളോടെ വിദ്യാലയത്തിന്റെ ആദ്യഘട്ട നവീകരണം പൂര്‍ത്തീകരിച്ചത്. എയര്‍ കണ്ടീഷന്‍ ചെയ്ത ഡിജിറ്റല്‍ ക്ലാസ് റൂമുകള്‍, നിലവാരമുള്ള ശുചിമുറികള്‍, ഫര്‍ണീച്ചറുകള്‍ ഉള്‍പ്പെടെയുള്ള ആധുനിക സൗകര്യങ്ങളാണ് സ്‌കൂളില്‍ ഒരുക്കിയിട്ടുള്ളത്. ചാവക്കാട് സബ് ജില്ലയില്‍ എയര്‍കണ്ടീഷനോട് കൂടിയ സമ്പൂര്‍ണ്ണ ഡിജിറ്റല്‍ സൗകര്യമുള്ള ആദ്യത്തെ വിദ്യാലയവും എടക്കഴിയൂര്‍ ഗവ.ലോവര്‍ പ്രൈമറി സ്‌കൂളാണ്.
