എക്സൈസ് വകുപ്പില് വിവിധ ജില്ലകളില് നിയമനം നല്കിയ 126 വനിത സിവില് എക്സൈസ് ഓഫീസര്മാരുടെയും 7 സിവില് എക്സൈസ് ഓഫീസര്മാരുടെയും പാസിംഗ് ഔട്ട് പരേഡ് ഇന്ന് (മെയ് 21). എക്സൈസ് അക്കാദമി പരേഡ് ഗ്രൗണ്ടില് രാവിലെ 8 മണിക്ക് നടക്കുന്ന പരേഡ് തദ്ദേശസ്വയംഭരണ ഗ്രാമവികസന എക്സൈസ് വകുപ്പ് മന്ത്രി എം വി ഗോവിന്ദന് മാസ്റ്റര് അഭിവാദനം ചെയ്യും. തുടര്ന്ന് മന്ത്രി ട്രെയിനികളുടെ സല്യൂട്ട് സ്വീകരിച്ച് പാസിംഗ് ഔട്ട് പരേഡ് പരിശോധിക്കും.
എട്ടാമത് ബാച്ചിലെ 126 വനിത സിവില് എക്സൈസ് ഓഫീസര്മാരുടെയും 25-ാം ബാച്ചിലെ 7 സിവില് എക്സൈസ് ഓഫീസര്മാരുടെയും പാസിംഗ് ഔട്ട് പരേഡാണ് എക്സൈസ് അക്കാദമി പരേഡ് ഗ്രൗണ്ടില് നടക്കുക. കോവിഡ് പശ്ചാത്തലത്തില് 2021 സെപ്റ്റംബര് ഒന്ന് മുതല് 126 വനിത ട്രെയിനികളുടെ അടിസ്ഥാന പരിശീലനം ഉദ്യോഗാര്ത്ഥികളുടെ മാതൃജില്ലയിലെ സൗകര്യപ്രദമായ എക്സൈസ് ഓഫീസുകളില് ഓണ്ലൈന് ഇന്ഡോര് ക്ലാസുകളായാണ് ആരംഭിച്ചത്. തുടര്ന്ന് 2021 ഒക്ടോബര് 18 മുതല് എക്സൈസ് അക്കാദമിയില് കായിക പരിശീലനവും ആരംഭിച്ചു. 180 പ്രവൃത്തി ദിവസത്തെ അടിസ്ഥാന പരിശീലനം ഇതിനോടകം ഇവര് പൂര്ത്തിയാക്കി. 7 സിവില് എക്സൈസ് ഓഫീസര് ട്രെയിനികളുടെ പരിശീലനം 2021 സെപ്റ്റംബര് ഒന്ന് മുതല് തന്നെ എക്സൈസ് അക്കാദമിയില് ആരംഭിച്ചിരുന്നു.
പരിശീലനം പൂര്ത്തിയാക്കുന്ന 126 വനിത ട്രെയിനികളില് ഭൂരിഭാഗം പേരും എം.ടെക്, എം എസ് സി നെറ്റ്, എം ബി എ, ബിരുദാനന്തര ബിരുദം ബിഎഡ്, ബിഫാം, എം എച്ച് ആര് എം, എം -ഡി എം എല് ടി എന്നിങ്ങനെ ഉന്നത വിദ്യാഭ്യാസം നേടിയവരാണ്. 180 പ്രവൃത്തിദിവസം നീണ്ടുനിന്ന ഇവരുടെ അടിസ്ഥാന പരിശീലനത്തില് ആംസ് ഡ്രില്, ഡില് വിത്തൗട്ട് ആംസ്, ഫയറിംഗ് പ്രാക്ടീസ്, ഫയര് ഫൈറ്റിംഗ് എന്നിങ്ങനെയുളള ഔട്ട് ഡോര് പരിശീലനത്തിനുപുറമെ കമ്പ്യൂട്ടര് പരിശീലനവും എക്സൈസ് വകുപ്പ് കൈകാര്യം ചെയ്യുന്ന അബ്കാരി ആക്ട്, എന്ഡിപിഎസ് ആക്ട്, കോട്പ, പ്രൊഹിബിഷന് ആക്ട് തുടങ്ങിയ വിവിധ നിയമങ്ങളിലുള്ള പരിശീലനവും കരസ്ഥമാക്കിയിട്ടുണ്ട്.
