കോഴിക്കോട്: സംസ്ഥാന സ്കൂള് കലോത്സവത്തില് കലാപരിപാടികള് കൃത്യസമയത്ത് ആരംഭിച്ച് കൃത്യസമയത്ത് അവസാനിപ്പിക്കാന് നടപടി ഉണ്ടാകുമെന്ന് വിദ്യാഭ്യാസ മന്ത്രി വി.ശിവന്കുട്ടി. ഇന്ന് 60 ഇനങ്ങളില് 41 എണ്ണം കൃത്യസമയത്ത് പൂര്ത്തിയാക്കാനായി.
ആദ്യ ക്ലസ്റ്ററില് മത്സരിക്കാന് കാണിക്കുന്ന വിമുഖതയാണ് പലയിടത്തും മത്സരങ്ങള് തുടങ്ങാനും വൈകി പൂര്ത്തിയാകാനും കാരണം. ഇക്കാര്യത്തില് മത്സരാര്ഥികളും രക്ഷിതാക്കളും അധ്യാപകരും ശ്രദ്ധിക്കണം. മൂന്നു തവണ വിളിച്ചു കഴിഞ്ഞിട്ടും മത്സരാര്ഥി വേദിയില് എത്തിയില്ലെങ്കില് മത്സരിക്കാനുള്ള അര്ഹത നഷ്ടപ്പെടുന്ന സാഹചര്യമുണ്ടാകും. ഇതൊഴിവാക്കാന് എല്ലാവരും സഹകരിക്കണമെന്നും മന്ത്രി അഭ്യര്ഥിച്ചു.