ന്യൂ ഡൽഹി: മെയ് 18, 2022
പ്രതിമാസ പെൻഷന്റെ സുഗമമായ വിതരണം ഉറപ്പാക്കുന്നതിന്,ഇനിയും വാർഷിക ഐഡന്റിഫിക്കേഷൻ/ലൈഫ് സർട്ടിഫിക്കേഷൻ പൂർത്തിയാക്കാത്ത പ്രതിരോധ വകുപ്പിലെ പെൻഷൻകാർ, 2022 മെയ് 25-നകം അത് പൂർത്തിയാക്കി സമർപ്പിക്കാൻ രാജ്യ രക്ഷ മന്ത്രാലയം ഒരിക്കൽ കൂടി അഭ്യർത്ഥിച്ചു.
2022 മെയ് 17 വരെ ലഭിച്ച ഡാറ്റ പരിശോധിച്ചപ്പോൾ, 2021 നവംബറോടെ സ്പർശ് സംവിധാനത്തിലേക്ക് മാറിയ 43,774 പെൻഷൻകാർ ഓൺലൈനായോ അവരുടെ ബാങ്കുകൾ വഴിയോ വാർഷിക ഐഡന്റിഫിക്കേഷൻ പൂർത്തിയാക്കിയിട്ടില്ലെന്ന് ശ്രദ്ധയിൽപ്പെട്ടു.
കൂടാതെ, പഴയ പെൻഷൻ സമ്പ്രദായത്തിൽ തുടരുന്ന പെൻഷൻകാരിൽ (2016-ന് മുമ്പ് വിരമിച്ചവർ) ഏകദേശം 1.2 ലക്ഷം പേർ ലഭ്യമായ ഏതെങ്കിലും മാർഗ്ഗത്തിലൂടെ വാർഷിക തിരിച്ചറിയൽ ഇതുവരെ പൂർത്തിയാക്കിയിട്ടില്ലെന്ന് അറിയിക്കുന്നു.
വാർഷിക ഐഡന്റിഫിക്കേഷൻ/ലൈഫ് സർട്ടിഫിക്കേഷൻ ഇനിപ്പറയുന്ന മാർഗ്ഗങ്ങളിലൂടെ ചെയ്യാവുന്നതാണ്:
1. ആൻഡ്രോയിഡ് ഉപയോക്താക്കൾക്കുള്ള ഡിജിറ്റൽ ജീവൻ പ്രമാൺ ഓൺലൈൻ/ജീവൻ പ്രമാൺ ഫേസ് ആപ്പ് വഴി
2. വാർഷിക ഐഡന്റിഫിക്കേഷൻ പൂർത്തിയാക്കുന്നതിന് പെൻഷൻകാർക്ക് പൊതു സേവന കേന്ദ്രങ്ങളും (CSC) സന്ദർശിക്കാവുന്നതാണ്. നിങ്ങളുടെ ഏറ്റവും അടുത്തുള്ള CSC ഇവിടെ കണ്ടെത്തുക: https://findmycsc.nic.in/
3. പെൻഷൻകാർക്ക് ലൈഫ് സർട്ടിഫിക്കറ്റിന്റെ പുതുക്കലിനായി അടുത്തുള്ള DPDO- സന്ദർശിക്കാവുന്നതാണ്. പരമ്പരാഗതരീതിയിലുള്ള പെൻഷൻകാർക്ക് അവരുടെ ലൈഫ് സർട്ടിഫിക്കേഷൻ അതത് ബാങ്കുകൾ വഴി അപ്ഡേറ്റ് ചെയ്യുന്നത് തുടരാം.
വാർഷിക ഐഡന്റിഫിക്കേഷൻ/ലൈഫ് സർട്ടിഫിക്കേഷൻ പ്രക്രിയ പ്രതിമാസ പെൻഷന്റെ തുടർച്ചയായതും സമയബന്ധിതവുമായ വിതരണത്തിന് നിയമപരമായ ആവശ്യകതയാണ്. എന്നിരുന്നാലും, വാർഷിക തിരിച്ചറിയൽ വിശദാംശങ്ങൾ മാസാവസാനത്തോടെ അതത് ബാങ്കുകൾക്ക് പരിശോധിക്കാൻ കഴിയാത്ത 58,275 പെൻഷൻകാർക്ക് (സ്പർശിലെ 4.47 ലക്ഷം മൈഗ്രേറ്റഡ് പെൻഷൻകാരിൽ) 2022 ഏപ്രിലിലെ പ്രതിമാസ പെൻഷൻ പ്രത്യേക ഒറ്റത്തവണ എഴുതിത്തള്ളൽ വഴി നൽകിയിട്ടുണ്ട്.
