26 C
Thrissur
ബുധനാഴ്‌ച, ഒക്ടോബർ 5, 2022

മലയാളം ഇന്റർനെറ്റ് പതിപ്പ്

www.general.com.in

- പരസ്യം -

മൾട്ടി ലെവൽ പാർക്കിംഗ്  രാജ്യത്തിന് തന്നെ അഭിമാനകരമായ പദ്ധതി: മന്ത്രി എം വി ഗോവിന്ദൻ മാസ്റ്റർ

വായിരിച്ചിരിക്കേണ്ടവ

 

ഗുരുവായൂർ നഗരസഭ ഒരുക്കിയ മൾട്ടിലെവൽ കാർ പാർക്കിംഗ് കേരളത്തിന് മാത്രമല്ല രാജ്യത്തിന് തന്നെ അഭിമാനകരമായ പദ്ധതിയാണെന്ന് തദ്ദേശസ്വയംഭരണ എക്സൈസ് വകുപ്പ് മന്ത്രി എം വി ഗോവിന്ദൻ മാസ്റ്റർ. ഗുരുവായൂർ നഗരസഭയുടെ മൾട്ടി ലെവൽ കാർ പാർക്കിംഗ് ഉദ്ഘാടനം നിർവഹിക്കുകയായിരുന്നു മന്ത്രി. വാഹന പാർക്കിംഗ് പല പ്രധാനപ്പെട്ട നഗരങ്ങളും  നേരിടുന്ന പ്രശ്നമാണ്. ഗതാഗതക്കുരുക്ക് പരിഹരിക്കണമെങ്കിൽ ചെറിയ സ്ഥലത്ത് ഇതുപോലുള്ള മൾട്ടിലെവൽ പാർക്കിംഗ് സൗകര്യങ്ങളുണ്ടാകണം. ഇത്തരം പ്രവർത്തനങ്ങൾക്ക് ഗുരുവായൂർ നഗരസഭ ഇനിയും നേതൃത്വം നൽകണമെന്നും മന്ത്രി അഭിപ്രായപ്പെട്ടു.

നമ്മുടെ നാടിന്റെ ഏറ്റവും വലിയ ശാപം തൊഴിലില്ലായ്മയാണ്. ഇത് പരിഹരിക്കുന്നതിനായി കേരളത്തെ ജ്ഞാന കേന്ദ്രമായി മാറ്റുകയാണ് സർക്കാരിന്റെ ലക്ഷ്യം. ഇതിന് വേണ്ടി ഉന്നത വിദ്യാഭ്യാസ മേഖലയിൽ വേണ്ട ഇടപെടലുകൾ നടത്തും. കേരളത്തിന്റെ ഏറ്റവും പ്രധാനപ്പെട്ട മൂലധനമായി ജ്ഞാന സമൂഹത്തെ  ഉപയോഗിക്കാൻ നമുക്ക് കഴിയണമെന്നും 20 ലക്ഷം ജനങ്ങൾക്ക് തൊഴിൽ നൽകാനുള്ള പദ്ധതി സർക്കാർ നടപ്പിലാക്കുമെന്നും മന്ത്രി പറഞ്ഞു. അഞ്ച് വർഷം കൊണ്ട് വീടില്ലാത്തവർക്ക് വീട് നൽകി എല്ലാവർക്കും വീട് എന്ന ലക്ഷ്യം സംസ്ഥാനം കൈവരിക്കുമെന്നും മന്ത്രി കൂട്ടിച്ചേർത്തു.

മൾട്ടി ലെവൽ  കാർ പാർക്കിംഗ് സമയബന്ധിതമായി പൂർത്തീകരിച്ച ഊരാളുങ്കൽ ലേബർ കോൺട്രാക്ട് സൊസൈറ്റി പ്രതിനിധി ജോഷിയെ മന്ത്രി ഉപഹാരം നൽകി ആദരിച്ചു.

കേരളത്തിൽ ആദ്യമായാണ് ഒരു തദ്ദേശ സ്വയംഭരണ സ്ഥാപനം  ഇത്തരമൊരു മൾട്ടി ലെവൽ പാർക്കിംഗ് പ്ലാസ നിർമ്മിക്കുന്നത്. ഗുരുവായൂരിന് ലഭ്യമായിട്ടുള്ള അമൃത് പദ്ധതിയിൽ 25 കോടി രൂപ ചെലവഴിച്ച് ശാസ്ത്രീയവും ആധുനികവുമായ സാങ്കേതിക സംവിധാനങ്ങളെ സംയോജിപ്പിച്ച് 6 നിലകളിലായി 12504 സ്ക്വയർ മീറ്റർ വിസ്തിർണ്ണത്തിലാണ്  സമുച്ചയം നിർമ്മിച്ചിട്ടുള്ളത്. 357 കാറുകൾ, 7 ബസുകൾ, 37 മിനി ബസുകൾ, നൂറിലധികം ടൂവീലറുകൾ എന്നിവ ഒരേ സമയം  പ്ലാസയിൽ പാർക്ക് ചെയ്യാം.

കൂടാതെ ഡ്രൈവർമാർക്കും യാത്രക്കാർക്കും വിശ്രമിക്കാനുള്ള സ്ഥലങ്ങൾ, 10 ബാത്ത്റൂം, 28 ടോയ്ലറ്റ്, എന്നീ സൗകര്യങ്ങളും ഒരുക്കിയിട്ടുണ്ട്. പാർക്കിംഗ് പ്ലാസയിൽ 2 ലിഫ്റ്റുകളും  ചെറിയ സ്നാക്സ് ബാറുകൾ, കിയോസ്കുകൾ എന്നിവയും ഏർപ്പെടുത്തിയിട്ടുണ്ട്. ഇലക്ട്രിക്ക് കാറുകൾ ചാർജ്ജ് ചെയ്യുന്നതിനായുളള അതിവേഗ ചാർജ്ജിങ്ങ് സ്റ്റേഷൻ സൗകര്യവും പാർക്കിംഗ് പ്ലാസക്കുളളിൽ ലഭ്യമാക്കും. കൂടാതെ വാഹനങ്ങളുടെ സുരക്ഷയ്ക്കായുളള ഫയർ ആന്റ് സേഫ്റ്റി സംവിധാനങ്ങൾ, ഓൺഗ്രിഡ് സോളാർ എന്നീ സംവിധാനങ്ങളും ഒരുക്കുന്നുണ്ട്. വാഹനങ്ങളുടെ സുഗമമായ പാർക്കിങ്ങിനായി സ്മാർട്ട് പാർക്കിംഗ് സംവിധാനങ്ങൾ മൾട്ടി ലെവൽ പാർക്കിംഗ് പ്ലാസയുടെ പ്രത്യേകതയാണ്.

എൻ കെ അക്ബർ എം എൽ എ  അധ്യക്ഷത വഹിച്ച ചടങ്ങിൽ നഗരസഭ ചെയ്ർമാൻ എം കൃഷ്ണദാസ് സ്വാഗതവും സെക്രട്ടറി ബീന എസ് കുമാർ നന്ദിയും പറഞ്ഞു. നഗരസഭ അസിസ്റ്റന്റ് എക്സിക്യൂട്ടീവ് എൻജിനീയർ ഇ ലീല റിപ്പോർട്ട് അവതരിപ്പിച്ചു. ഗുരുവായൂർ ദേവസ്വം ചെയർമാൻ  ഡോ.വി കെ  വിജയൻ, നഗരകാര്യ ഡയറക്ടറും അമൃത് മിഷൻ ഡയറക്ടറുമായ അരുൺ കെ വിജയൻ, ചാവക്കാട് നഗരസഭ ചെയർപേഴ്സൺ ഷീജ പ്രശാന്ത്, ഗ്രാമ പഞ്ചായത്ത് അസോസിയേഷൻ ജില്ലാ സെക്രട്ടറി ടി വി സുരേന്ദ്രൻ, ഗുരുവായൂർ നഗരസഭാ വൈസ് ചെയർപേഴ്സൺ അനീഷ്മ ഷനോജ്, വാർഡ് കൗൺസിലർ കെ പി ഉദയൻ, സ്റ്റാൻഡിങ് കമ്മിറ്റി അംഗങ്ങൾ, കൗൺസിലർമാർ  തുടങ്ങിയവർ പങ്കെടുത്തു.  ഉദ്ഘാടനത്തോടനുബന്ധിച്ച് ഗന്ധർവാസ് ബാന്റ് നയിച്ച സംഗീത വിരുന്നും ഉണ്ടായിരുന്നു.

- Advertisement -

കൂടുതൽ ലേഖനങ്ങൾ

- Advertisement -
- Advertisement -

പുതിയ ലേഖനങ്ങൾ

- Advertisement -